བཀབ་ནེའི་འབྱུང་ཁུངས་དང་དེའི་དར་ཚུལ།

སྤྱིར་འཛིམ་གླིང་ནང་དར་ཚུལ།

སྤྱིར་བཏང་འཛམ་གླིང་ནང་དར་ཚུལ་འདི་ཡང་སྔོན་སངས་རྒྱས་བཅོམ་ལྡན་འདས་ཀྱིས་འཁོར་རྣམ་པ་བཞི་ལུ་འདུལ་ཁྲིམས་བཅའ་སྟེ་གནང་བའི་སྐབས་སུ་ཆོས་གོས་རྣམ་གསུམ་གྱི་ཁྱད་པར་ཚུ་མཛད་དེ་འདི་ཚུ་གཙོ་བོ་གུས་ཞབས་ཀྱི་དོན་ལུ་དང་བསྙེན་རྫོགས་དང་བསྙེན་རྫོགས་མིན་པའི་དགེ་སློང་ཚུ་གི་བར་ན་ཁྱད་པར་ཕྱེ་ནིའི་དོན་ལུ་གྱོན་དགོཔ་སྦེ་གསུངས་ཞིནམ་ལས་ཚུར་བཀབ་སྲོལ་བྱུང་ནུག

འཁོར་རྣམ་པ་བཞི་ནི-

དགེ་སློང་། དགེ་སློང་མ། དགེ་བསྙེན་ཕ། དགེ་བསྙེན་མ།

ཆོས་གོས་རྣམ་གསུམ་ནི-

བླ་གོས།  མཐང་གོས།  སྣམ་སྦྱར།

འབྲུག་རྒྱལ་ཁབ་ནང་དར་ཚུལ།

ཧེ་མ་དུས་རབས་བརྒྱད་པའི་ནང་བུམ་ཐང་རྒྱལཔོ་་སིནྡྷུ་ར་ཛཱ་གིས་གུ་རུ་རིན་པོ་ཆེ་ལྷོ་མོན་འབྲུག་ལུ་གདན་འདྲེན་ཞུཝ་བཞིན་དུ་གུ་རུ་རིན་པོ་ཆེ་གིས་བུམ་ཐང་སྐུ་རྗེ་ལུ་་བྱོན་ཏེ་གནས་བདག་ཤེལ་གིང་དཀར་པོ་དམ་ལུ་བཏག་གནངམ་མ་ཚད་འབྲུག་མི་ཚུ་ལུ་སྲོག་གཅོད་པ།མ་བྱིན་ལེན་པ།མི་ཚང་སྤྱོད ་པ།རྫུན་་སྨྲ་བ།ཆང་འཐུང་བ་འདི་ཚུ་འབད་མ་ཆོག་པའི་དགེ་བསྙེན་གྱི་སྡོམ་པ་གནང་ཞིནམ་ལས་ཚུར་གཙོ་བོ་ཆོས་ཀྱི་མཛད་སྒོ་དང་འབྲེལ་བའི་སྐབས་སུ་གུས་ཞབས་ཀྱི་དོན་ལུ་དང་དགེ་བསྙེན་གྱི་སྡོམ་པ་ཡོད་ཟེར་བའི་བརྡ་དོན་ལུ་མི་སེར་སྤྱིར་བཏང་གིས་བཀབ་ནེ་དཀརཔོ་དང་དགེ་སློང་གི་རིགས་ འདུལ་བ་ལས་གསུངས་པའི་ཆོས་གོས་འདི་ཚུ་ལག་ལེན་འཐབ་སྲོལ་བྱུང་ནུག

དུས་རབས་༡༧པའི་ནང་ཞབས་དྲུང་ངག་དབང་རྣམ་རྒྱལ་མཆོག་གིས་ཆོས་སྲིད་ལུགས་གཉིས་ཀྱི་གཞུང་དབུ་བཙུགས་གནང་ཚར་ཞིནམ་ལས་ཚུར་ དཔོན་ཁག་གཙོ་ཅན་གྱི་རིགས་དགེ་འདུན་གྱི་སྡེ་ལས་བསྐོས་པའི་སྐབས་སུ་གཉིས་སྐལམ་དང་ལྷན་རྒྱས་ཀྱི་ན་བཟའི་དབྱེ་བ་སོ་སོ་མཛད་གནངམ་མ་ ཚད་སྤྱིར་བཏང་ག་ར་བཀབ་ནེ་དཀརཔོ་བཀབ་དགོ་པའི་སྲོལ་བྱུང་ནུག

འདི་ཡང་གཙོ་བོ་བླམ་སློབ་དཔོན་བཞུགས་སར་བཅར་བའི་སྐབས་དང་ཆོས་ཞུ་བ་འི་སྐབས་སུ་གུས་ཞབས་ཀྱི་དོན་ལུ་དང་དཔོན་ཁག་འདི་ཚུའི་གོ་ གནས་ངོས་འཛིན་གྱི་དོན་ལུ་ལག་ལེན་འཐབ་སྲོལ་བྱུང་ནུག

སྤྱི་ལོ་༡༦༥༠ལས་འགོ་བཙུག་སྟེ་སྡེ་སྲིད་ཚུ་གི་སྐབས་ལུ་དཔོན་ཁག་འདི་ཚུ་མི་སྐྱ་ལས་བསྐོས་སྲོལ་བྱུང་པའི་སྐབས་སུ་མི་སྐྱ་ལས་བསྐོས་པའི་དཔོན་ ཁག་འདི་ཚུ་ལུ་ཡང་སྔར་སྲོལ་དང་འཁྲིལ་ཏེ་གོ་སའི་རྟགས་སུ་མཛད་གནངམ་མ་ཚད་། ཆིབས་ཞོན་པའི་རིགསབཀབ་ནེ་དཀརཔོ་བཀབ་དགོ་པའི་སྲོལ་བྱུང་ནུག འདི་མ་ཚད་རྟོགས་ལྡན་སྒརཔ་༼རྒཔོ༽ ཚུ་ལུ་གོས་དཀར སྔགས་པའི་ཆས་དང་འདྲ་བར་མཛད་གནང་ནུག འདི་ཡང་གཙོ་བོ་གུས་ཞབས་དང་གོ་གནས་ཀྱི་དབྱེ་བ་ཕྱེ་ནིའི་དོན་ལུ་མཛད་གནང་ནུག

བཀབ་ནེ་གི་ལག་ལེན།

༡-ལྷ་ཁང་དགོན་སྡེ་དང་རྫོང་གཞི་ཚུ་ནང་ལས་འགྱོ་བའི་སྐབས།  སྐྱེས་བུ་དམ་པའམ་རང་ལས་མཐོ་བའི་གོ་གནས་ཅན་ཚུ་དང་མཇལ་ཕྲད་

  འབད་བའི་སྐབས། ཕྱག་དབང་བཅར་ཞུ་དང་རྟེན་འབྲེལ་རྩིས་སྲུང་གི་སྐབས། ཆོས་ཞུ་བའི་སྐབས་སུ་གུས་ཞབས་ཀྱི་བརྡ་མཚོན་ལུ་ལག་ 

  ལེན་འཐབ་ཨིན།

༢-མི་སྐྱ་ལས་འགོ་བཙུག་སྟེ་རྒྱལ་ཁབ་ཀྱི་དབུ་ཁྲིད་ཚུན་ རང་སོའི་འགན་ཁུར་དང་བསྟུན་པའི་གོ་གནས་ཀྱི་བརྡ་མཚོན་ལུ་ལག་ལེན་འཐབ་ 

  ཨིན།

༣-ཧེ་མ་འབད་བ་ཅིན་ས་ཐག་རིང་སར་འགྱོ་དགོཔ་རེ་འཐོན་པའི་སྐབས་སུ་་ཅ་ལ་འདི་ཚུ་འབག་ནིའི་དོན་ལས་ལག་ལེན་འཐབ་སྲོལ་ཡོད་རུང་ 

  ད་རེས་ནངས་པ་རྒྱལ་ཁབ་ཀྱི་ཡར་རྒྱས་བསྒྱུར་བ་ལུ་བརྟེན་ཏེ་ཅ་ཆས་འབག་ནི་གི་ཕད་ཅུང་མ་འདྲཝ་ཚུ་ལག་ལེན་འཐབ་ཨིན་པས།

༤-ཞབས་ཁྲ་འདི་ཚུ་རྐྱབ་པའི་སྐབས་དང་ཆིབས་གྲལ་གྱི་སྐབས་སུ་འབངས་རྔ་ཀྲིང་ཀྲིང་དང་དར་འབག་མི་ཚུ་གིས་ཡང་བཀབ་ནེ་ཕྱག་རྐྱབ་སྟེ་

  བཀབ་སྲོལ་ཡོདཔ་ཨིན།